Para Alternativa Ciudadana de Ponteareas "a única obra que levou adiante o actual goberno municipal da vila nestes catro anos de mandato é un exemplo máis de desgoberno e malgasto económico".

A do Paseo Matutino "é unha obra de 2016, cunha execución que se iniciou a correr en setembro 2018. Segundo indicaban no contrato coa empresa adxudicataria, a duración dos traballos serías dun mes e medio; a realidade foi ben distinta, pois a obra finalizou 'inicialmente' o 30 de decembro" explican. "Ata ese momento veciños e comerciantes tiveron que vivir todo tipo de contratempos e molestias", situación que ACiP achaca "á concelleira de vías e obras, a socialista Chus Garrote, quen durante estes catro anos xamais pisou as rúas nin fixo seguimento de obras, deixando pasar o tempo no seu despacho oficial".

"Esta situación de descontrol provoca que, en pleno mes de decembro, co inicio dunha campaña de Nadal tan importante para os comerciantes, o goberno inicie as obras para instalar un novo colector, cortándose toda a Avenida de Galicia ao tráfico" aseguran engadindo que "os veciños, ademais, advertiron e denunciaron que a execución dos traballos non era a correcta, pois se estaban mesturando as augas fecais coas pluviais; denuncias ás que, unha vez máis, fíxose caso omiso desde o concello".

"Concluídas e certificadas as obras, comprobamos como algúns dos investimentos previstos non se executan; en concretooas que facían referencia a sinalización, pintado e papeleiras. Novo exemplo, unha vez máis, deste descontrol que se vive de portas dentro no grupo de goberno" asegura o portavoz de ACiP nun comunicado.

"O máis grave de todo é que pouco despois, nun día de choiva como outro calquera, desbórdase unha das arquetas de fecais e asolaga a rúa, o que leva ao concello a realizar unha nova contratación, agora por un importe de 19.000 euros, para abrir a rúa e reparar ese desaguisado. Fixérono, ademais, valando as obras para que ninguén poida ver a chapuza acometida. A iso engádese o corte da rúa ao completo, en lugar de facelo por tramos para facilitar o tráfico e, especialmente, o traballo dos comerciantes da zona, que están a sufrir todo tipo de contratempos tan sequera para poder recibir a mercadoría" indica.

"A día 13 de febreiro a situación segue igual e o concello mantense nos seus trece e facendo caso omiso ante as queixas e denuncias dos veciños". Para Juan Carlos González Carrera, portavoz de ACiP, “ese descontrol ao que tanto aludimos volve demostrarse unha vez máis. Está claro que por unha banda manda a concelleira de vías e obras e por outro o alcalde. Non hai coordinación, cada un vai ao seu e fai o que lle vén en gana, malgastando miles de euros en tres actuacións (primeiro tramo do Paseo Matutino: 170.000 euros; colocación colector fecais en Avenida de Galicia, por erro das obras anteriores: 40.000 euros; parche final de 19.000 euros) que fartaron á cidadanía e que aínda non se solucionaron, cinco meses despois, cando a obra estaba programada para mes e medio de duración. Non nos queda outra que lamentar profundamente esta situación e pedir desculpas a todos os afectados por este goberno municipal que nos está tocando sufrir a todos”.