O alcalde de Vigo, Abel Caballero, estivo presente este luns na presentación dun novo vehículo pesado desenvolvido por unha empresa da cidade co obxectivo de optimizar o transporte por estrada, mellorar a eficiencia de cada viaxe e eliminar así camións das estradas europeas.  

"É unha cuestión moi significativa, o que fixo Efitransa é un modelo de transporte de automóbiles que unha vez completada a entrega poida converterse nun camión de mercadoría xeral", apuntou o rexedor durante a súa rolda de prensa no Concello. 

Pola súa banda, o delegado de Zona Franca, David Regades, manifestou a súa satisfacción "por participar neste tipo de empresas produtivas, que aplican o coñecemento vigués para producir no noso territorio emprego e riqueza".

A empresa Efitransa de eficiencia no sector do transporte, que se creou en Vigo en 2015, foi elixida como unha das 20 mellores startups a nivel mundial polo grupo PSA. Desde a súa participación na primeira edición da aceleradora de automoción, a Bussines Factory Auto (BFA), deu un salto empresarial ata poder ter 15 patentes rexistradas internacionalmente.

Actualmente está a fabricar para Renault trinta unidades do seu camión polivalente e outras setenta do seu "camión cargo" para varios clientes. Como explicaron Alfonso Sousa, socio fundador, e Miguel Cabrera, director xeral de Efitransa, "estes camións proporcionan unha maior capacidade de carga a menor custo e contribúen a reducir de forma significativa a pegada de carbono".

Os modelos da firma viguesa, ademais de ser seleccionados como un dos mellores proxectos para o Grupo PSA (Peugeot-Citroën- Opel), tamén foron galardoados recentemente co Premio ao Mellor Proxecto de Innovación a nivel mundial no Grupo Renault-Nissan-Mitsubishi, con quen ademais pecháronse xa os primeiros acordos para a posta en marcha deste tipo de camións en varias rutas europeas.