A presidenta da Deputación de Pontevedra, Carmela Silva, amosouse esta semana “moi orgullosa” tras ter coñecido a elección da institución provincial como unha das nove integrantes da Comisión Executiva da Rede estatal de Destinos Turísticos Intelixentes que gobernará a Rede DTI. A Rede, que esta mañá se puxo a andar coa sinatura dos protocolos para a participación, impulso, apoio e promoción da rede e coa constitución das comisións, está integrada por 60 destinos do conxunto do Estado sendo a Deputación, amais, entidade promotora.

“A Comisión Executiva da Rede DTI está integrada por 9 entidades das 60 do conxunto do Estado que a configuran, polo que para nós é un orgullo que nos teñan elixido porque é todo un espaldarazo a nosa aposta por políticas turísticas vangardistas, eficientes e sostibles”, asegurou a presidenta provincial. Neste eido, Carmela Silva incidiu en que a Deputación de Pontevedra é a única institución galega e xunto con Avilés as únicas do Noroeste Peninsular en formar parte da Comisión Executiva, integrada por 9 destinos.  Así, xunto á Deputación pontevedresa e a Avilés tamén forman parte da Comisión Executiva da Rede DTI os concellos de Benidorm, Calviá, Donostia, Arona, Santander e San Bartolomé de Tirajana, así como a Deputación de Palencia.

Para a presidenta da Deputación “que sexamos a única administración galega en ser escollida polo Goberno do Estado para participar na Comisión Executiva da Rede DTI, manifesta que a nosa aposta pola intelixencia aplicada ao turismo, pola accesibilidade, pola sustentabilidade, pola calidade e pola modernización tecnolóxica do sector turístico, está a ser un éxito”.  De feito, a Rede DTI vai a ser a encargada de definir o modelo de turismo do futuro, promovendo un novo marco de referencia baseado na innovación, coñecemento, tecnoloxía e gobernanza para construír espazos turísticos innovadores, sobre unha infraestrutura de vangarda que garanta o desenvolvemento sostible do territorio, a accesibilidade,  a interacción e a integración da persoa visitante coa contorna, así como a mellora da calidade de vida das persoas que residen nos destinos.

 

A Comisión Executiva está integrada por só 9 organismos dos 60 do conxunto do Estado que configuran a Rede. “Que sexamos a única administración galega manifesta que a nosa aposta pola intelixencia aplicada ao turismo está a ser un éxito”

 

Deste xeito, Silva informou dos principais obxectivos que ten a Comisión Executiva da Rede DTI para este ano 2019 e entre os que se atopan a coordinación dos destinos turísticos intelixentes con Segittur e Red.es así como o lanzamento de servizos de información e asesoramento a destinos turísticos intelixentes sobre axudas e fondos europeos. Entre as súas liñas de acción para este ano a Comisión celebrará o segundo encontro do grupo de traballo de xestores/as DTI e lanzará as ferramentas de soporte á Rede DTI, máis en concreto o portal de destinos turísticos intelixentes,  CRM e unha ferramenta de autodiagnose.   Amais, a Comisión Executiva da Rede DTI vai iniciar os plans de acción de novos DTI, colaborar co III Congreso Mundial de Destinos Turísticos Intelixentes e aprobar e presentar un programa de traballo da Rede.

Sinatura do protocolo para a participación, impulso, apoio e promoción da Rede DTI
A presidenta da Deputación tamén asinou esta mañá en Madrid, en presenza da secretaria do Estado de Turismo, Isabel Oliver, o protocolo a través do cal a institución provincial forma parte da Rede estatal de Destinos Turísticos Intelixentes (DTI), integrada por 60 destinos. Neste eido, a partir de hoxe calquera destino que vaia impulsar proxectos para converterse en DTI segundo a metodoloxía de Segittur pode adherirse á rede, así como empresas que teñan plans de traballo con destinos xa incluídos na mesma.