A concellería de Participación Cidadá do Concello de Mos que dirixe a edil Julia Loureiro organiza para os maiores do municipio unha visita de dous días a Asturias que terá lugar o 23 e 24 de marzo.

Un aspecto moi importante a destacar deste tipo de saídas, é que fortalece os lazos entre os veciños e veciñas fomentando a súa vez a autonomía persoal, as habilidades de socialización e o aprendizaxe, entendéndoo este como aspecto imprescindible a desenvolver ó longo da vida.

Os obxectivos da iniciativa son dar resposta á demanda da cidadanía veciña de Mos da  terceira idade de viaxar, facer visitas culturais e artístico históricas, favorecer o coñecemento doutras cidades e provincias, promover o turismo como ferramenta de lecer, aprendizaxe e socialización, impulsar a participación e integración social das persoas maiores na comunidade, e previr a soidade.

As persoas beneficiarias directas desta actividade serán tódolos/as maiores de 65 anos ou de 55 anos en condición de pensionistas e preferentemente empadroados/as no Concello de Mos. De quedar prazas vacantes, poderán ser cubertas por persoas que non cumpran os requisitos expostos anteriormente, sempre respectando a orde de rexistro.          

Para participar nesta actividade hai que anotarse no departamento de Participación Cidadá (Edificio Multiusos) ou no Rexistro do Concello, facéndoo de maneira presencial para asinar a solicitude, ou a través da sede electrónica da web do Concello. O prazo de inscrición rematará o 11 de marzo.

Os participantes na viaxe coñecerán Cudillero, pequeno municipio situado na Costa Centro Occidental de Asturias, visitarán Tapia de Casariego, localidade tamén da costa asturiana, Luarca, localidade asturiana con casiñas brancas e tellados de pizarra, e Castropol, que recibiu no ano 1997 o premio ao Pobo Exemplar de Asturias.

O prezo da actividade é de 119€ por persoa.