O PSdeG-PSOE de Salceda de Caselas  realizou durante toda a lexislatura un plan de traballo que consistiu en visitar as parroquias ano tras ano, levando a cabo xuntanzas para coñecer as inquedanzas da veciñanza e colectivos.  A situación de abandono e falta de comunicación do goberno municipal con esas entidades fixo que os socialistas sexan en Salceda o voceiro de moitos destes colectivos.

Estas xuntanzas danlle ós socialistas de Salceda "unha visión xeral dos problemas e inquedanzas da sociedade salcedense, polo que este traballo verase reflectido no programa electoral" que a Agrupación Local selas está a realizar de cara ás próximas eleccións municipais.

Por outra banda, nestes meses previos aos comicios locais os socialistas de Salceda están a realizar reunións sectoriais para continuar enriquecendo o programa electoral coas aportacións das entidades deportivas, musicais, sociais, ecoloxistas, culturais e comerciais do Concello.

Busca deste xeito o PSOE, ser un reflexo das demandas sociais do concello a través dun programa participativo e consensuado con toda a veciñanza.

A voceira socialista e candidata á alcaldía Verónica Tourón explica que “cremos na política de proximidade, e esa é a que levamos facendo durante toda a lexislatura, achegando a política municipal a toda a veciñanza”.