A Asociación Galega do Patrimonio Industrial (Buxa) presentou estas emana a mostra “O camiño por Mar” que inclúe o proxecto de reconstrución da embarcación “Naomhóig”, o barco empregado por catro amigos irlandeses para facer o Camiño de Santiago a remo desde Dublín e que acabou por se converter no emblema do Camiño Xacobeo por Mar.

O bote, depositado no Museo do Mar de Galicia despóis da súa varada en Portugal, vai ser reconstruído no marco desta exposición, epicentro dunha serie de actividades que rememorarán a tradición do Camiño por Mar, da navegación e das históricas relacións galaico-irlandesas.

Segundo o presidente de Buxa, Manuel Lara Coira, “serán os propios remeiros os que realizarán as labores de reconstrución no mes de xuño, uns traballos que poderán seguirse en directo no marco da mostra presentada hoxe e que poderá visitarse no Museo do Mar de Galicia do 7 de xuño ao 31 de outono”. “Arredor de dito proxecto” –sinalaba- “desenvolveranse outras actividades de diverso contido en diferentes formatos e medios de cara a valoración e promoción do Camiño Xacobeo por Mar”.

Liam Holdem, un dos remeiros copropietario do bote, interviña facendo públicas as conversas cos amigos cos que fixera a viaxe así como a súa disposición e satisfacción á hora de colaborar neste proxecto.

Pola súa banda, Pádraig Ó Duinnín, fundador da obra social Meitheal Mara, resumía a actividade do estaleiro Meitheal Mara e daba conta da redacción do acordo de colaboración entre eles, Buxa e o Museo do Mar de Galicia.

 

O proxecto, liderado por Buxa, Asociación Galega do Patrimonio Industrial, contempla ademáis outras actividades para difundir e poñer en valor o Camiño Xacobeo por Mar

 

Liam Holden e Pádraig Ó Duinnín visitan estes días Vigo convidados por Buxa para planificar e organizar a restauración deste barco tradicional irlandés no marco da mostra.

Ao redor deste proxecto Buxa deseñou todo un proxecto cultural composto por toda unha serie de actividades de diverso contido e alcance (dende colexios de ensinanza primaria a asociacións profesionais) e diferentes formatos e medios (talleres, conferencias, exposicións, documentos audivisuais...) co fin de difundir e poñer en valor o Camiño Xacobeo por Mar.

A Xunta de Galicia, Televisión de Galicia, Eixo Atlántico, Universidade da Coruña, Meitheal Mara, Varadoiro do Xufre, Culturmar, Asociación de Carpinteiría de Ribeira e outros organismos a nivel nacional e internacional, acolleron esta iniciativa comprometéndose a sumar esforzos para a boa consecución do proxecto.

Unha viaxe en bote dende Dublín a Santiago de Compostela

No ano 2014 un grupo de amigos irlandeses deciden xuntarse para construír un bote co que emprender o Camiño Xacobeo a remo dende Dublín a Santiago de Compsotela. A viaxe compoñíase de 2.500 quilómetros por mar que se fixo de maneira espaciada durante tres anos. Tras pasar polas costas inglesas e francesas, o bote bordeaba costas españolas para desembarcar finalmente no porto da Coruña. Densde alí, os tripulantes continuaron a peregrinación a pé ata Santiago de Compostela.

A construción do currach – así se denomina a embarcación- non foi doada. Agás Danny Sheehy, impulsor do proxecto, que era carpinteiro e pescador, os remeiros procedían de mundos alleos á navegación. Despois de traballar arreo durante varios meses, puideron comezar as probas de navegación e os adestramentos para a travesía.

 

Un dos remeiros copropietario do bote, Liam Holden e o fundador da obra social Meitheal Mara, Pádraig Ó Duinnín, visitan estes días Vigo convidados por Buxa para planificar e organizar a restauración deste barco tradicional irlandés no marco da exposición 

 

En medio dunha grande expectación mediática, a aventura concluíu con éxito no ano 2016. Un ano máis tarde, os catro amigos decidiron facer unha ruta pola costa galega que acabou cun fatídico accidente en Caminha levándose por diante a vida de Danny e a embarcación.

Buxa

Buxa (www.asociacionbuxa.com) é unha entidade sen ánimo de lucro cuxa finalidade é o fomento do coñecemento da industria nos seus ámbitos técnico, arqueolóxico, histórico, económico, sociolóxico, ambiental e historiográfico. Para a consecución deste fin, desde Buxa procúrase a recuperación, rehabilitación e reconstrución material do patrimonio industrial de Galicia, así como o mellor coñecemento, defensa e promoción do mesmo como parte da nosa historia; en definitiva, a posta en valor do noso patrimonio industrial.