Os montes da Guarda e do Rosal acolleron o pasado domingo día 7 de abril a primeira proba de Enduro da zona, a “Baixo Miño Enduro Experience”, unha proba deportiva na que se combina a habilidade técnica do DH(Descenso) e a resistencia física do XC(Rally).

Durante o percorrido desta proba os participantes tiveron que superar desniveis considerables (ata 1200m de desnivel acumulado), alternando tramos de enlace con tramos cronometrados entre as localidades da Guarda e do Rosal, cun percorrido total duns 28km.

A “Baixo Miño Enduro Experience” é unha proba puntuable no Open de Galicia de Enduro coa particularidade de ter 5 tramos cronometrados cun percorrido que se realizou nun entorno idílico para a práctica da disciplina de Enduro, cunhas paisaxes espectaculares co río Miño, a Costa e o Porto da Guarda, os Castros de Santa Trega, o Rosal e os seus viñedos e a desembocadura do Miño.

Os participantes sairon ás 8:30h dende a Alameda da Guarda para dirixirse ata o Monte Terroso, onde realizaron os primeiros catro tramos cronometrados, seguido de preto por moitas persoas que non se quixeron perder este evento deportivo.

Dende o Monte Torroso os ciclistas desprazaronse ata o Monte Santa Trega, onde realizaron o tramo cronometrado final, rematando este na rúa de Circunvalación ao Monte Santa Trega e dirixíndose despois á Alameda da Guarda, onde tivo lugar a entrega de premios.

Nesta I edición da Baixo Miño Enduro Experiencie os gañadores absolutos da proba foron, na categoría masculina Santos Lemos Ramírez, na categoría feminina Desiree Duarte Castro e na categoría de e-bikes Javier Vara Blanco. Destaca o terceiro posto do ciclista local Jonathan Sousa Araujo na categoría Élite, que o coloca líder na Copa de Galicia de Enduro.

Dende o Concello da Guarda se quere agradecer o traballo realizado pola organización do evento a través do Clube Ciclista Insitu, aos voluntarios, GES da Guarda, patrocinadores, empresas e a todas as persoas e institucións que fixeron posible que unha proba deste calibre se celebrase na vila da Guarda.