A Xunta de Galicia vén de publicar a primeira guía de recomendacións para evitar os efectos do gas radón nas vivendas xa existentes, ofrecendo información detallada sobre as solucións que se poden adoptar en cada tipo de vivendas para facer fronte ao mesmo.

O Instituto Galego da Vivenda e Solo elaborou unha publicación que contén información para que os usuarios poidan comprobar se a súa vivenda está en situación de risco de contaminación por radón e especifícanse as distintas solucións construtivas, incluído o seu custo estimado para o que se terán en conta as obras complementarias e necesarias para levala a cabo, a súa correcta execución, así como as súas vantaxes e inconvenientes, co obxecto de lle facilitar ao técnico a elección das medidas máis adecuadas a cada caso particular.

A publicación Radón. Guía de recomendacións da mitigación en vivendas existentes, e o seu anexo técnico, pódese descargar en formato pdf dende a propia web do IGVS: www.igvs.es, tamén está dispoñible en www.xornal21.es.

O radón está considerado como canceríxeno pola Organización Mundial da Saúde (OMS), de acordo coa Axencia Internacional para a Investigación do Cancro (IARC).