O director xeral de Políticas Culturais, Anxo M. Lorenzo, asistiu hoxe á homenaxe ao poeta Manuel Antonio cando se cumpren 90 anos da publicación do poemario De catro a catro, a súa obra máis significativa.

Os actos conmemorativos tiveron lugar no CIFP Manuel Antonio de Vigo e deron comezo as 12,00 horas cunha mesa redonda na que participaron Xosé Luís Méndez Ferrín e Xosé Luis Axeitos. A continuación procedeuse á apertura da exposición fotográfica Galegas e Galegos de hoxe. Esta mostra está composta por imaxes de persoas destacadas en diferentes ámbitos como o deporte, a música, a literatura, a investigación ou o ensino.

Un dos principais actos desta xornada foi a presentación da publicación conmemorativa, editada por Hércules Ediciones e financiada pola Consellería de Cultura e Turismo, na que máis de 60 profesionais de distintos ámbitos colaboran para manter vivo o recordo do poeta a través de escritos, debuxos ou pinturas.

A homenaxe a Manuel Antonio complétase cunha mostra monográfica sobre a súa traxectoria na que se expoñen obxectos, fotografías e manuscritos orixinais que foron cedidos pola Casa Museo e pola Fundación Barrié de la Maza.