Movemento Salceda deu a coñecer este sábado a candidatura coa que concorre ás vindeiras eleccións municipais do 26 de maio, nun acto que se celebrou no Auditorio Municipal.

A lista, formada por 10 mulleres e 13 homes, está encabezada polo actual Alcalde, Marcos Besada, e nela participa ao completo o seu equipo de goberno, "abalando así o traballo realizado nos doce anos que levan gobernando". As sete parroquias están representadas na candidatura, que ademais "combina a experiencia coa xuventude, ofrecendo así o grupo de persoas que mellor pode representar aos salcedenses para dirixir o Concello de Salceda. Fundamental resulta tamén a enorme vinculación dos candidatos e das candidatas co tecido asociativo do municipio, con representación en moitas das asociacións existentes no Concello" explican.

O acto contou coa intervención das persoas que ocupan os seis primeiros postos da lista (Tere Pérez, Javi Alonso, Lucía Pereira, Miguel González, Alex Rodríguez e Loli Castiñeira) para dar paso finalmente a Marcos Besada, que se encargou de presentar os 23 integrantes da lista.

No acto falouse do "difícil que foi a actual lexislatura para un equipo de goberno en minoría no que o PSOE decidiu aliarse co PP e facer pinza en todos cada un dos puntos importantes para Salceda, atrevéndose incluso a votar en contra do cumprimento da lei. A pesares disto Movemento Salceda conseguiu sacar adiante importantes proxectos que seguen a transformar Salceda día a día" explican.

En palabras do actual Alcalde e candidato por Movemento Salceda, Marcos Besada, “Salceda iniciou hai case doce anos unha nova etapa para o seu futuro. Un Concello e unha vila pensados para a xente, un Concello onde vivir, traballar e gozar, recuperando o orgullo de vivir en Salceda e ofrecendo ó País unha nova imaxe tras máis de trinta anos de goberno do Partido Popular. Ó longo destes anos demostramos que temos un proxecto para o noso Concello e capacidade para facelo posible. Síntome orgulloso de poder contar na candidatura que encabezo con persoas comprometidas cos seus veciños e veciñas, persoas sempre ao servizo da xente, persoas comprometidas coa xente con dificultades, coa xente que precisa máis atencións, coa xente maior, coa infancia, coa xente que non ten traballo...”.