A voceira e candidata do PP, Belén Villar, denuncia a incompetencia do actual goberno tripartito que non foi quen de sacar adiante o PXOM nestes últimos catro anos e agora quere aprobalo de calquer forma en plena campaña electoral.

“En plena campaña ocórreselles aprobar o plan, sen presentar nas comisións os novos planos, as supostas novas modificacións, cunha total inseguridade que desde logo o grupo que lidero non vai apoiar”.

Villar denuncia que Chus Garrote, responsable de Urbanismo, leva desde novembro sen convocalos, que realizaron unha comisión informativa o pasado venres na que varios grupos da oposición informaron da existencia de graves erros no documento e cambios de gran calibre, algo que non está permitido xa que a modificación debe ser baixo os criterios que a Xunta informou. “Garrote enviounos un email solicitando que comunicásemos os erros detectados. Ademais de non realizar o seu traballo esíxenos a nós que o fagamos. Este grupo é responsable e quere o mellor para Ponteareas, por iso onte contestou ao requirimento de Garrote, candidata socialista, informando dalgunhas das deficiencias que contén o documento e que detectamos”.

Por outra banda o PP tamén está a estudar algunhas recalificacións que se fixeron de parcelas, para saber que criterios seguíronse e se cumpre coa Lei de Solo. “Detectamos algunhas recalificacións. Por outra banda seguimos solicitando un calendario de reunións onde podamos traballar e participar todos os grupos e o equipo redactor do Plan Xeral. Descoñecemos os criterios que seguiron para cambiar a natureza das parcelas. Tamén se nos informou que chegaron algunas reclamacións que foron tidas en conta, polo que creánse veciños de primeira e de segunda, xa que moitos descoñecen os grande cambios que fixeron e non se lles da a oportunidade de presentar alegacións”.

Villar comprométese a revisar o documento, co equipo redactor e todos os grupos da oposición, e insta ao tripartito a que decline levar ao pleno o PXOM tal e como está actualmente. “É o seu propio documento e din que que non lles gusta, pois aos grupos da oposición tampouco. Como líder da oposición mantiven reunión cos veciños, colectivos e asociacións e tampouco respaldan este documento. Polo tanto non encontramos motivos para que sexa levado agora ao pleno”.