Conscientes dos problemas cos que se atopan día a día os condutores e peóns que transitan por Ponteareas, e que de rebote están afectado ao comercio e a hostalería locais, ACiP presenta un plan de acción que levaría a cabo nos cen primeiros días de goberno se a cidadanía outórganos o seu apoio.

Entre as medidas de dinamización, presentadas polo candidato de ACiP á alcaldía, Juan Carlos González Carrera, e o responsable de tráfico e seguridade na candidatura deste partido, Pablo Araújo, o plan contempla a creación de 500 prazas de aparcadoiro público gratuíto repartidas en catro aparcadoiros que se situarán de forma estratéxica en puntos do centro urbano da vila.

ACiP considera vital e urxente a creación destes aparcadoiros á vista dos problemas que actualmente existen en Ponteareas e cos que, ademais, buscar a maneira de evitar o acoso incansable dos auxiliares de Policía Local, que están a multar constantemente de forma irregular, “algo que non se pode permitir”, recalcou o candidato de ACiP á alcaldía de Ponteareas.

“Cremos que son moi importantes estas 500 prazas porque o verán está ao virar a esquina e porque existe un problema real de estacionamento ao que non se lle deu solución nestes últimos anos. Somos conscientes do breve do prazo que establecemos, pero estamos preparados para habilitar eses parkings en cen días e ademais estarían completamente acondicionados e coa iluminación necesaria. Fixemos a xestión previa cos propietarios dos terreos e temos claro que sería viable nos primeiros meses de mandato chegar a acordos e convenios definitivos para as cesións desas parcelas”, insistiu González Carrera.

Por outra banda, e non menos importante, o plan de ACiP contempla tambien a revisión de todos os pasos de peóns da vila e a redacción dun plan específico que incluíse a mellora da sinalización e a iluminación; principais causantes do elevado número de atropelos que se produciron ultimamente.