Cos últimos grupos repartidos en dúas visitas de mañá e de tarde, a Deputación de Pontevedra pechou este sábado unha nova edición das visitas teatralizadas ao Castelo de Soutomaior que este ano volveron a conseguir un completo éxito de público con máis de 300 persoas que, desde finais de abril, puideron desfrutar da historia do recinto, contada dun xeito dinámico, divertido e marcado pola innovación e o emprego das novas tecnoloxías.

A presidenta da Deputación, Carmela Silva, mostrou a súa satisfacción “xa que si en anos anteriores xa contamos cunha enorme acollida, este ano o éxito foi tal que as prazas se esgotaron en cuestión de horas e que aínda que as ampliamos non chegaron para toda a demanda que tivemos”. “O próximo ano, anunciou xa a presidenta, haberá máis prazas e prolongaremos as visitas teatralizadas máis tempo”. Silva puxo en valor que “as visitas non so son vangardistas e apostan pola innovación e as novas tecnoloxías para que sexan interactivas, senón que con elas enxalzamos o noso patrimonio, conseguimos un turismo desestacionalizado e damos resposta á fame de experiencias que da nome a nosa campaña deste ano”. A presidenta provincial apuntou que “en todo caso o valor máis importante e que con iniciativas como esta conseguimos devolver o Castelo de Soutomaior ás familias e á xente, de quen sempre tivo que ter sido”.

 

A presidenta provincial, Carmela Silva, xa anunciou que “o próximo ano revalidaremos esta aposta de vangarda para contar a historia que serviu para devolver o Castelo á xente”

 

Este ano, ao través de diferentes personaxes, caracterizados coa animación das actrices e actores da Compañía Troula, as persoas que participaron nas visitas coñeceron parte da historia de Galicia, que descorreu no Castelo de Soutomaior, de xeito innovador e divertido, estimulando a curiosidade e con escenificacións que non deixaron indiferentes nin a maiores ni aos nenos e nenas, xa que as visitas están enfocadas ao público familiar. Así, é a bufona Burlona, anfitrioa da visita e encargada de abrir as portas da fortaleza, presentou a cabaleiras e cabaleiros, cociñeiras e cociñeiros, xograresas e xograres, pantasmas e novos personaxes como Teresa de Távora, cuxa historia serve para descubrir un novo punto de vista do castelo. Teresa foi a muller de Pedro Madruga e xogou un papel moi activo nos conflitos e alianzas da nobreza galega, ata o punto de recuperar os bens que o Rei de Castela retirara a Madruga.