O presidente do Goberno galego, Alberto Núñez Feijóo, avanzou esta semana que a Xunta está a estudar a afectación que pode ter o impago de 700 millóns do Executivo central nas contas públicas galegas e pedirá ao Goberno actual unha solución inmediata. “Só hai unha única alternativa posible: pagar o que se debe”, dixo, incidindo en que Galicia solicitará formalmente, de acordo co Parlamento, “os 700 millóns para seguir pagando facturas, pagando nóminas e pagando o que se debe na Comunidade autónoma”.

Nesta liña, Feijóo advertiu de que esta situación nunca se ten producido e xa está a provocar tensións de tesourería nas contas da Comunidade Autónoma, e lembrou que xa hai precedentes de que un Goberno en funcións aprobe decretos lei, referíndose a modo de exemplo aos reais decretos aprobados polo Executivo en 2016 en materia de activación do emprego e de medidas tributarias para reducir o déficit.

“Estamos entrando no último semestre do ano e só temos escusas: a escusa de que o Goberno está en funcións, pero o Consello de Ministros se reúne; a escusa de que non houbo orzamentos, pero todos lembramos os venres sociais, nos que se aprobaron decenas de reais decretos leis pero ningún en relación coa sanidade, a educación e os servizos sociais das comunidades autónomas”, abundou, facendo fincapé en que a inestabilidade política que padece España non é culpa de ningunha comunidade autónoma e “con escusas non podemos pagar as nóminas nin as facturas.”

 

“Nos presupostos galegos faltan 530 millóns e o total da débeda contraída polo Goberno de España coa Comunidade ascende a 700 millóns”, resume, recalcando que, de non solucionarse, Galicia recibirá eses 530 millóns no verán do 2021

 

Na rolda de prensa do Consello, Feijóo explicou que as cantidades pendentes de recibir do exercicio 2019 son: 330 millóns da actualización das entregas a conta do exercicio 2019; 200 millóns da devolución da mensualidade do IVE do exercicio 2017; e 170 millóns do incentivo á comunidades cumpridoras. E precisou que Galicia incluíu nos seus orzamentos de 2019 os 330 millóns das entregas a conta porque é a cifra que o Goberno comunicou en xullo de 2018; e outros 200 millóns da mensualidade do IVE porque a ministra de Facenda comprometeuse a solucionar esta cuestión.

“Nos presupostos da Comunidade autónoma faltan 530 millóns de euros e o total da débeda contraída polo Goberno de España coa Comunidade ascende a 700 millóns de euros”, resumiu o presidente, recalcando que, de non solucionarse este asunto, a Comunidade recibirá os 530 millóns, “un diñeiro que é noso”, no verán do 2021, unha vez liquidado o sistema de financiamento autonómico do exercicio 2019.  

Para concluír Feijóo lembrou que en Galicia hai estabilidade política, “cumprimos as regras, pagamos en tempo e forma e non merecemos ese trato”.