A alcaldesa de Mos, Nidia Arévalo, e o concelleiro da parroquia de Cela, Gonzalo Alonso Táboas, xunto con membros da Comisión de Festas da Virxe das Neves de Herville e da Comunidade de Montes, visitaron os traballos de acometida da obra de conexión á rede municipal de saneamento, en Herville de Abaixo, do recinto do Castro.

Os labores de instalación do saneamento nesta zona foron realizados con fondos propios da Comisión de Festas, sendo a obra xestionada pola Comunidade de Montes en Man Común de Herville e executada con man de obra municipal, é dicir, levada a cabo por traballadores do Concello.

A conexión do recinto do Castro de Herville á rede de saneamento en Herville de Abaixo era unha importante necesidade da zona, ao tratarse dun área de lecer e servizos que conta cunha gran afluencia de público. Por elo esta mellora tratábase dunha das demandas prioritarias da veciñanza do barrio de Herville.

A obra, que se prolongou durante un prazo aproximado de 9 días, xa se atopa rematada e en funcionamento. Durante os traballos instaláronse 570 metros de tubería coas súas correspondentes arquetas.

Os representantes municipais, Arévalo e Alonso, declararon sentirse “satisfeitos ao terse feito realidade esta importante mellora para Herville” e destacaron “a importancia da colaboración entre entidades, xa que esta obra foi posible grazas á cooperación e traballo conxunto entre Comisión de Festas, Comunidade de Montes e Concello”.