A Xunta de Goberno da Deputación de Pontevedra vén de aprobar a segunda adxudicación de obradoiros do programa “Depo en Marcha”, que oferta ata 149 obradoiros para este ano 2019. Ata o momento tíñanse xa aprobadas 130 accións formativas que, coa adxudicación das 19 aprobadas na Xunta de Goberno para 11 concellos da provincia, completa o programa dirixido a persoas maiores da provincia.

 

En total rexistráronse case 300 solicitudes para estas actividades que pretenden favorecer o envellecemento activo e mellorar a calidade de vida das persoas

 

O programa “Depo en Marcha 2019” espalla pola provincia de Pontevedra obradoiros, de 30 horas de duración, englobados en oito grandes áreas temáticas “Traballando coas mans”, “Entre fogóns”, “Aprendendo da natureza”, “Móvete”, “Activando corpo e mente”, “Enredando”, “Dálle marcha” e “En rede”. Os principais obxectivos deste programa son favorecer o envellecemento activo, optimizar as oportunidades de saúde, participación e seguridade, mellorar a calidade de vida das persoas maiores, establecer relacións sociais e favorecer a participación en actividades que melloren o seu estado anímico, así como potenciar movementos de participación e cooperación social, promover espazos de encontro e impulsar a independencia das e dos maiores para evitar o illamento e as situacións de soidade.