Case dous anos despois de terse aprobado a adhesión do Porriño ao protocolo Concellos Doing Business, "o Goberno Municipal continúa sen levar a cabo as modificacións e redacción das ordenanzas fiscais precisas para formalizar a incorporación.  En novembro de 2017, o pleno aprobou de forma unánime a proposta do Partido Popular de sumarse á lista de municipios adheridos ao convenio Doing Bussines, un plan promovido pola Xunta de Galicia e a Fegamp para fomentar a implantación de empresas. A día de hoxe, o municipio continúa sen incorporarse" explican os populares.

"A pasividade de Eva García, que non foi quen de elaborar unha simple ordenanza,  é unha mostra do seu nulo compromiso co progreso económico e social do pobo que representa. A alcaldesa chegou a pedirnos que redactáramos nós as ordenanzas, e así o fixemos pese a non ser o noso cometido. E nin con esas", lamenta o voceiro dos populares, Alejandro Lorenzo, "Mentres desatende as súas obrigas e se cruza de brazos, adícase a gabarse en prensa por logros alleos á súa xestión".

Os populares esixen, unha vez máis, que a rexedora cumpra a súa parte e leve a cabo de inmediato a modificación das ordenanzas que permitan ao Concello beneficiarse dos termos ofrecidos no convenio para rebaixar os impostos e as taxas municipais e ofertar unha maior axilidade administrativa.

"A captación de investimentos é esencial para o desenvolvemento económico e é fundamental que dende o Concello se contribúa a crear un contexto máis favorable para desenvolver proxectos na actividade empresarial", conclúe Lorenzo, "A mellora económica dun Concello cun potencial industrial como o do Porriño, non se consigue subindo os impostos, senón atraendo novas empresas, investimentos e emprendedores e, en consecuencia, máis emprego. Achegándolles máis incentivos fiscais, menos “papeleo” administrativo e unha oferta de solo industrial coas mellores condicións".

O Porriño, Concello Emprendedor

De formalizarse a adhesión ao convenio, O Porriño ofrecería máis incentivos fiscais, menos barreiras burocráticas e facilidades de acceso a solo empresarial e, ademais, terá preferencia nas axudas económicas destinadas a impulsar a industria, o emprego ou o emprendemento, cando as convocatorias sexan en réxime de concorrencia competitiva.