A Xefatura Territorial de Infraestruturas e Mobilidade de Pontevedra lémbralle á alcaldesa de Salceda de Caselas, Dolores Castiñeira, que as obras que o municipio está a realizar para facilitar o enlace do vial de servizo da PO-510 á glorieta que dá acceso ao parque da Gándara non contan coa autorización necesaria.

Dende a administración autonómica, recórdanlle á rexedora que tanto o vial de servizo como a PO-510 son estradas de titularidade da Xunta de Galicia, e que para levar a cabo obras de mellora na mesma necesitan contar cun permiso por escrito e que “non todo vale”, segundo apuntou José Luis Díez, xefe territorial do departamento de Infraestruturas na provincia.

 

Ante a perigosidade que presentan os traballos de acceso realizados, a administración autonómica acaba de instalar medidas de seguridade para impedir a entrada na rotonda

 

Ante a perigosidade que supón a entrada de vehículos dende a vía de servizo á glorieta da PO-510, a Consellería de Infraestruturas e Mobilidade tomou a decisión de instalar medidas de seguridade que impiden o acceso á mesma. Estas medidas manteranse no tempo para garantir a seguridade viaria. Ademais, a administración autonómica acaba de abrir expediente sancionador ao concello pola súa actuación desleal.