O Concello de Vigo puxo en marcha unha nova iniciativa de promoción da candidatura das Illas Cíes como Patrimonio da Humanidade dentro do programa cultural para fomentar a difusión do patrimonio natural do arquipélago vigués coa actividade "Desafío Audiovisual e Fotográfico Illas Cíes".

O alcalde, Abel Caballero, informou en rolda de prensa de que "o obxectivo é redescubrir as illas como un Laboratorio Artístico" sobre o que desenrolar o enxeño e a creatividade. Esta primeira edición da iniciativa centrarase nas disciplinas audiovisual e fotográfica coa selección de seis grupos de seis persoas ligadas ao ámbito audiovisual e seis fotógrafos.

O prazo de inscrición estará aberto ata o vindeiro 17 de setembro e os seleccionados permanecerán catro días nas Cíes (do 26 ao 29 de setembro) para o proceso de realización de obras.

"Os equipos e fotógrafos estarán guiados en todo momento por membros do Comité Técnico e Científico da Candidatura Illas Cíes Patrimonio da Humanidade", apuntou o alcalde durante a súa comparecencia ante los medios.

Tras a fase de edición de obras, os proxectos deberán ser presentados antes do 30 de outubro e avalados por un Comité de Expertos constituído para tal fin. Para a edición haberá unha bolsa económica de axuda que garantirá a calidade óptima dos traballos. No caso dos proxectos fotográficos serán 1.200 euros e un premio final de exposición da obra, mentres que nos proxectos audiovisuais son 800 euros por equipo e un premio final audiovisual de 1.000 euros ao gañador.

A última fase será a exposición fotográfica e a presentación dos vídeos o vindeiro mes de decembro.