A presidenta da Deputación de Pontevedra, Carmela Silva, valorou os datos da EPA do terceiro trimestre do ano, “de xeito positivo polos resultados da provincia de Pontevedra onde o paro baixou en 4.200 persoas”, pero ao mesmo tempo mostrou a súa preocupación “porque en Galicia suba o desemprego con 3.100 persoas máis situándose así en 143.500”. “Espero, dixo Silva, que alguén dea explicacións sobre este dato, xa que cando os números  son positivos parece que é grazas ao traballo da Xunta e cando non son bos, tiran balóns fóra”.

Respecto á provincia, a presidenta afirmou estar “satisfeita cos resultados porque creo que este é o maior problema que temos, aínda que hai que seguir mellorando para unha maior redución do desemprego e na calidade do emprego. Aínda así, o feito de que Pontevedra sexa a única provincia galega na que diminúe o paro indica que aquí temos un maior dinamismo da actividade económica e do emprego”. En canto aos datos de ocupación, a EPA indica que na provincia pontevedresa hai 8.700 persoas máis ocupadas que no segundo trimestre de 2019.

Carmela Silva tamén explicou que “a nivel estatal, aínda que non é suficiente, o  descenso do desemprego é unha boa nova”. Amais, en España, o número de persoas ocupadas aumentou en 69.400 persoas e sitúase en 19.874.300 empregados e empregadas. Na comparativa interanual o emprego medrou en 364.300 persoas, é dicir, un 1,77% respecto ao terceiro trimestre de 2018.