A Deputación de Pontevedra leva esta semana as xornadas formativas sobre administración electrónica dirixidas aos equipos dos gobernos a outros oito concellos da provincia. O obxectivo desta programación é dar a coñecer as principais funcionalidades e cambios máis relevantes da plataforma de administración electrónica “Gestiona”, da institución provincial, co fin de dar resposta a cada un dos cumprimentos marcados pola lei 39/2015 e a lei 40/2015.

En concreto,o luns a acción formativa tiña lugar en Soutomaior; o mércores 27 será a quenda do concello de Gondomar; o xoves 28 chegan as xornadas a Lalín; e, o venres 29 recibirán a formación os concellos de Tui e do Grove. Amais, no que respecta aos concellos de menos de 5.000 habitantes, o mércores 27 recibirán a formación nas dependencias da Deputación os concellos de Catoira, Meis e Covelo. A través das sesións formativas a institución provincial vai dotar de ferramentas e de información sobre a administración electrónica aos novos equipos de goberno.

Máis polo miúdo, darase a coñecer os diferentes libros de rexistro de entrada e saída, a utilización do xestor de expedientes, o acceso ás diferentes convocatorias na aplicación de órganos colexiados, activar as sinaturas electrónicas na nube e no móbil, consultar o rexistro e expedientes, visualizar os libros de actas, consultar experiencias ou presentar mocións e preguntas. En total, este novo plan de formación vai beneficiar a 53 concellos da provincia adheridos ao proxecto de administración electrónica.