A Consellería de Infraestruturas e Mobilidade, a través de Augas de Galicia, vén de comprobar a emenda dun punto de vertido de augas residuais no concello de Redondela, con afección ao curso do río Fondón, no seu percorrido polo lugar de Angorén, na parroquia de Chapela.

As emisións contaminantes foron identificadas polo persoal do Plan de Control de Vertidos de Augas de Galicia no marco das labores rutineiras de control á rede fluvial do concello e na liña de costa no ámbito do municipio pontevedrés.

 

Os inspectores de Augas de Galicia solicitaron ao Concello a adopción de medidas para a emenda deste vertido, quen procedeu á reparación da filtración detectada nun pozo de rexistro da rede municipal de saneamento

 

O resultado da inspección levada a cabo polos técnicos de Augas de Galicia permitiu localizar unha filtración detectada nun pozo de rexistro da rede municipal de saneamento. A problemática detectada foi posta en coñecemento do Concello de Redondela para que  procedese a adoptar accións correctivas para a emenda da contaminación asociada ao punto de vertido.

Recentemente, os técnicos dependentes de Augas de Galicia realizaron unha nova comprobación do punto de vertido, e comprobaron que a reparación da filtración realizada polo Concello permiten o cese dos aportes irregulares que se producía ao domino público hidráulico.