O BNG trasladará ao Parlamento Galego este mércores, 18 de decembro, "a loita para frear a modificación puntual do PXOM de Mos coa que se pretende legalizar a construción dunha cidade deportiva e un centro comercial nos montes de Pereiras e Tameiga". O Grupo Parlamentar do BNG rexistrou varias preguntas dirixidas á Xunta de Galiza sobre o procedemento seguido para aprobar este documento, que é cualificado no escrito asinado polas deputadas e deputados nacionalistas coma “un exemplo de libro de desvío de poder e uso das institucións para favorecer o interese privado sobre o público”.

"O goberno de Feijóo debera xustificar no pleno a súa posición ante unha operación urbanística que ameaza con arrasar case un millón de metros cadrados de solo rústico, gran parte deles de protección forestal. Entre outras cuestións, a Xunta de Galicia debe aclarar se considera xustificada a declaración de utilidade pública para un proxecto privado que ten unha clara intencionalidade lucrativa" sinalan os nacionalistas mosenses.