O conselleiro de Economía, Emprego e Industria, Francisco Conde, avanzouna entrega da terceira edición do premio Galicia Global que a Xunta activará un novo programa para impulsar a internacionalización dixital das pemes. Será unha das liñas dos programas Galicia Exporta, que no seu conxunto contarán na próxima edición con 11,2 millóns de euros, un 40% máis que na anterior convocatoria, co obxectivo de que as pemes poidan acceder e medrar nos mercados internacionais, promovendo ademais a diversificación dos destinos das vendas.

Conde foi o encargado de entregar o recoñecemento da Asociación Española de Directivos (AED), a Josefina Fernández, conselleira delegada de DomusViGroup, polo proceso de expansión internacional da compañía de servizos para a terceira idade.

 

Subliña que a diferenciación e a excelencia son claves nos avances nos mercados exteriores do tecido empresarial galego

 

Na súa intervención, o conselleiro de Economía, Emprego e Industria sinalou que a diferenciación e a excelencia son claves nos avances do tecido empresarial galego nos mercados exteriores, un elemento fundamental para que as empresas garantan o seu crecemento, o seu rendemento e a súa competitividade.

Así, Francisco Conde indicou que as empresas galegas deben responder ás esixencias que marcan os retos internacionais, adoptando solucións que prioricen a innovación, a sustentabilidade e a formación do talento, sen renunciar á súa identidade. Para iso, reiterou o compromiso da Xunta neste eido.