O Concello de Salvaterra de Miño presenta o programa de charlas formativas que se impartirán dende o Orquidiario do Parque Público A Canuda  entorno ao coidado das orquídeas.

O Parque Público A Canuda, o pulmón verde do Sur da Provincia de Pontevedra, conta con máis de 200.000m2 e dentro desas instalación alberga o único orquidiario de Galicia e Norte de Portugal, que a día de hoxe expón máis de 100 variedades e preto de 500 orquídeas., que fai que sexa unha zona de parada obrigatoria para os amantes desta planta que conta cun espazo moi especial neste marabilloso parque, que mestura natureza e ocio.

Este ano 2020 ponse en marcha dende o propio Orquidiario un programa de charlas formativas sobre o cultivo e coidado de varias variedades de orquídeas que se levarán a cabo a través da colaboración coa Asociación Portuguesa de Orquidofilia. Esta asociación creouse no ano 2007 en Lisboa e conta con 546 asociados;  nestes momentos participa en diversas feiras – exposicións en Portugal e España, xa que colabora xunto ao Concello de Salvaterra na organización da súa Feira – Exposición Internacional de Orquídeas.