O PSdeG-PSOE ponse en marcha para preparar as Eleccións Autonómicas do próximo 5 de abril e consolidarse, por quinta vez consecutiva, como primeira forza política da provincia de Pontevedra. O Comité Executivo Provincial (CEP) reuniuse, baixo a dirección do secretario xeral provincial, David Regades para aprobar o calendario de elaboración da candidatura pontevedresa.

Os socialistas elixen a súa candidatura durante a próxima semana, nun proceso que comeza este mesmo domingo, día 23, e remata o venres, día 28. Arranca coa celebración das asembleas en tódalas agrupacións  locais da provincia entre os días 22 e 25 nas que poderán postularse as/os militantes. A Comisión Executiva Provincial, á luz das votacións e de consultas con tódalas direccións, fará a súa proposta de candidatura o mércores, día 26. A Executiva Nacional fará o propio coas candidaturas das catro provincias galegas o día 27 e, finalmente, o Comité Federal dará a aprobación final o venres, día 28. David Regades destacou que os socialistas volven dar exemplo de cultura democrática “porque somos un partido moi participativo e iso permítenos facer as mellores listas”. “Así o entendeu tamén a cidadanía desta provincia”, engadiu, “que deunos o apoio maioritario nas catro últimas convocatorias.

 “Estamos preparados para gobernar Galicia, e a provincia de Pontevedra volverá facer a súa achega converténdose novamente no graneiro de votos do PSdeG-PSOE”. “Necesitamos”, recalcou, “unha Xunta de Galicia que deixe atrás a crispación constante e a confrontación partidista cos gobernos locais, provinciais e do Estado, porque hai problemas urxentes que arranxar e necesitamos a un goberno ocupado cos problemas reais da xente”. “Galicia precisa saír da atonía”, explicou, “recuperar a Sanidade e Educación públicas e deixar atrás o álbum de fotos negras do señor Feijoo, porque despois das imaxes das vacacións cun coñecido narcotraficante, un de tantos que tanto dano fixeron a toda unha xeración de galegas e galegos, agora chegan as fotos cun empresario mexicano, Emilio Lozoya, arrestado por corrupción e que era “o seu gran amigo”.

O secretario xeral provincial dos socialistas apunta que é evidente que o PP está “moi nervioso” e engadiu que ten motivos sobrados para elo “porque sabe que tras perder catro eleccións fronte ao socialismo está a piques de perder as quintas”. Esta é a razón, continuou, de que vexamos tódolos días a altos cargos do PP que, a falta de xestión e investimentos da Xunta que poñer en valor, dedícanse a espallar “fake news” pola provincia adiante.
Regades, que mesmo ironizou co feito de que as Eleccións galegas convocounas un nacionalista vasco, como o lehendakari Urkullu, destacou que “o mellor que lle pode pasar á veciñanza de calquera pobo ou vila da provincia de Pontevedra é que o próximo presidente da Xunta sexa un pontevedrés, como Gonzalo Caballero, que coñece moi ben as necesidades desta provincia, que son moitas”.

Agora, afirmou o secretario xeral pontevedrés, hai que poñerse a traballar para explicar un programa que estará centrado na xeración de emprego, a construción dun proxecto industrial e a garantía dunha Sanidade pública e unha educación de calidade que funcionen como aposta demográfica e de futuro para Galicia. Para elo, os socialistas realizarán unha campaña moi pegada ao territorio, próxima á xente e na que David Regades compromete a súa implicación persoal “ao 200% para volver gastar as zapatillas”. Unha campaña que vai ter dous piares centrais, por un lado o aval do Goberno de España coa presencia de ministros e ministras e, por outro, o da participación dos alcaldes e alcaldesas “que son a demostración de que cando nós gobernamos, as cousas fanse doutro xeito”.  O PSdeG-PSOE fará así valer o peso institucional nunha provincia na que 600.000 dos seus 900.000 habitantes teñen unha alcaldesa ou alcalde socialista.