A Deputación de Pontevedra iluminará desde hoxe o Pazo Provincial de cor verde para conmemorar o Día Mundial das Enfermidades Raras e así unirse ás reivindicacións da Federación Galega de Enfermidades Raras e Crónicas (FEGEREC). Con esta iniciativa, que alongarase desde a tarde deste venres ata o domingo 1 de marzo, preténdese visibilizar ás persoas que sofren enfermidades minoritarias e impulsar a investigación.

Este 2020 desde a Federación Española de Enfermidades Raras propúxose o lema ‘Crecer contigo, a nosa esperanza’. Nesta ocasión o obxectivo será poñer de manifesto o papel do movemento asociativo, poñendo en valor o traballo das entidades e as persoas que traballan por mellorar a vida das persoas que sofren algunha enfermidade rara. En concreto quérese destacar o seu papel como impulsores da investigación, como axente que ofrece servizos e como transformador social.