A Xunta vén de remitirlle ao Concello de Redondela unha proposta de convenio de colaboración para impulsar a execución da reforma e mellora da seguridade da estrada PO-363, ao seu paso polo centro do concello.
A Xunta agarda que o Concello de Redondela axilice ao máximo a resposta o convenio e a consignación presupostaria necesaria para poder licitar e adxudicar as obras no menor prazo posible.

Trátase de dar resposta á demanda do Concello de Redondela para a humanización dun tramo dun quilómetro desta vía de características marcadamente urbanas, que coincide coa Avenida de Mendiño, e que ten un investimento estimado de 1,6 millóns de euros.

Nunha carta remitida polo director da Axencia Galega de infraestruturas, Francisco Menéndez, á alcaldesa, Digna Rosa Rivas, trasládalle tamén o proxecto definitivo redactado polo departamento da Xunta, no que grande parte do investimento se corresponde con servizos urbanos de titularidade municipal.

A base de colaboración económica proposta no convenio establece unha achega de 433.000 euros por parte do Concello, que se corresponden coas partidas de renovación das redes de saneamento e abastecemento e ao 50% da partida de renovación do alumeado e semaforización. Esta fórmula de colaboración xa se utilizou para impulsar a primeira fase da humanización da PO-323 executada pola Xunta de Galicia en Chapela.

 

A Xunta agarda que o Concello de Redondela axilice ao máximo a resposta o convenio e a consignación presupostaria necesaria para poder licitar e adxudicar as obras no menor prazo posible

 

O director da Axencia Galega de Infraestruturas amósalle deste xeito á rexedora municipal a disposición da Xunta de iniciar o procedemento para a contratación das actuacións prevista no treito Redondela-Praia de Cesantes, tras recibir a conformidade do Concello e a consignación orzamentaria do cofinanciamento municipal.

Cómpre sinalar que esta intervención permitirá optimizar a circulación por esta vila e o acceso a múltiples servizos públicos que se atopan na contorna.

O primeiro treito, ata o centro de saúde, concentra a renovación máis intensa, xa que se ampliarán as beirarrúas con acabados en granito, se sobreelevarán os pasos de peóns, así como as canalizacións do abastecemento e saneamento.

Neste tramo tamén se reordenarán os cruces e se habilitarán os cambios de sentido necesarios no centro de saúde e centros educativos.

​No intervalo ata o peirao estenderase unha nova capa de rodadura, melloraranse as interseccións e colocarase nova sinalización horizontal.