O Centro de Acollida e Protección de Animais da Deputación de Pontevedra na Armenteira está pechado ao público desde o Decreto do Estado de Alarma establecido polo COVID-19 e, polo tanto, as adopcións de cans e cadelas están suspendidas, aínda que o CAAN mantén os servizos mínimos de xeito permanente para o servizo de lacería.

O centro, que sostén a súa actividade de atención e coidado aos 300 cans e cadelas que acolle actualmente, restrinxiu as recollidas aos casos de atención necesaria: aqueles con animais feridos, animais potencialmente perigosos, animais mantidos en instalacións municipais non habilitadas para o seu coidado, animais libres que poidan causar accidentes ou lesións e actuacións de emerxencia requiridas polo poder xudicial e os corpos e forzas de seguridade. No caso de entrega de animais aos seus propietarios realízase con cita previa e de xeito individual.

 

O centro mantense pechado ao público e as devolucións de animais recollidos aos seus propietarios realízanse con cita previa

 

Desde que entrou en vigor o estado de alarma, houbo sete recollidas de animais dentro destes supostos nos concellos de Marín, Caldas, Redondela, Nigrán (2), Baiona e Meaño. En tres casos  (Marín, Caldas e un dos de Nigrán), os cans puideron ser devoltos aos seus propietarios.

No centro reduciuse a presenza física ao mínimo persoal necesario, que traballa coas medidas hixiénicas e distancias de seguridade en quendas diferenciadas por actividades. Así mesmo, establecéronse servizos indispensables para a limpeza das instalacións e a alimentación e atención veterinaria permanente dos animais.