A provincia diminuíu en abril considerablemente os expedientes pendentes de informe grazas a dispoñer da ferramenta do teletraballo que permitiu a continuidade da actividade administrativa realizada polos empregados públicos da Dirección Xeral de Patrimonio Cultural. En concreto, Pontevedra pasou de 533 a 247 expedientes, o que supón minorar o retraso na tramitación un 53,66%.

Trátase dun dato extraído do informe de actividade deste departamento da Consellería de Cultura e Turismo relativo ao primeiro cuadrimestre do ano, no que se precisa que a provincia tivo un rexistro no período de 997 asuntos, realizándose un total de 1655 informes e  ditándose 654 resolucións. No caso concreto de abril, efectuáronse un total de 466 informes, un 12,63% máis que a media do cuadrimestre, e resolvéronse un total de 163 resolucións.

Continuidade da administración online
Neste tempo de confinamento pola pandemia do COVID-19, a Administración autonómica no eido do Patrimonio Cultural continuou coa súa actividade a través das conexións ao escritorio remoto e o acceso as plataformas de tramitación electrónica de expedientes. De feito, o ritmo de ditames a través do teletraballo durante o confinamento foi similar á media do resto de meses do cuadrimestre e nalgúns casos superior.

En conxunto, o departamento da Consellería de Cultura e Turismo tivo ao longo do primeiro cuadrimestre do ano unha entrada de 5609 asuntos, emitiu 6023 informes e ditou 2827 resolucións nas Xefaturas territoriais, no Camiño de Santiago e no Servizo de Arqueoloxía.

Este traballo de tramitación administrativa permitirá mellorar a axilidade patrimonial ante a sociedade galega ao supoñer unha redución de prazos na resolución de expedientes en canto se retome a actividade ordinaria.