A Xunta de Goberno da Deputación de Pontevedra ven de aprobar a concesión de novas achegas por valor de 843.000 euros ao abeiro do Plan Concellos, que beneficiarán neste caso a seis municipios da provincia: Nigrán, Portas, Vilaboa, Baiona, Poio e Redondela. Con estas axudas o ente provincial leva xa concedidos 14,2 millóns de euros entre as tres liñas do Plan

No caso da Liña 1 de Investimentos aprobáronse catro novas achegas por valor de 532.397,87 euros. Máis polo miúdo, para Nigrán aprobouse unha subvención por un importe total de 130.976,27 euros coa que se financiará o proxecto de rehabilitación da antiga casa do mestre e do aulario para o seu uso como local de reunión. O concello de Portas recibirá unha achega de 170.146,82 euros coa que acometerá a reforma do seu campo de fútbol. En Vilaboa pavimentarase o camiño de Santa Marta, na parroquia de Bértola, grazas a unha axuda de 98.083,41 euros. Pola súa banda, o concello de Baiona recibirá 133.191,37 euros cos que mellorará a pavimentación e a seguridade viaria do Camiño Serralleira, en Sabarís.

Para o concello de Poio foi aprobada unha concesión de subvención por reinvestimento de baixas por un importe de 61.194,39 euros. A vila empregará este financiamento para mellorar os servizos e firmes na rúa Costa de Abaixo de Combarro.

Doutra banda, o Goberno aprobou a modificación dunha achega concedida a Redondela da Liña 3 de Emprego. O concello solicitou esta modificación para realizar un reaxuste nas categorías, duración e orzamento das contratacións debido á situación derivada da crise sanitaria producida polo Covid19.