Desde o Concello de Mos infórmase de que ven activarse nesta administración local o sistema Cl@ve para a realización de trámites administrativos municipais de xeito telemático.

Mediante este sistema o cidadán mosense pode contactar co Concello de xeito telemático de forma sinxela e segura, sen moverse da casa, desde o seu teléfono móbil ou calquera outra ferramenta informática (ordenador, Tablet…)

Así os veciños e veciñas de Mos poden xa comunicarse coa administración local a través da páxina web www.mos.es e da sede electrónica do Concello de Mos https://mos.sedelectronica.gal/ e realizar todo tipo de trámites: solicitudes de certificados e volantes de empadroamento, instancias en xeral, queixas e suxestións, achega de documentación aos seus expedientes, etc. Algo moi importante, cómodo, práctico e seguro, máxime nos tempos de crise sanitaria que estamos a vivir.

Para obter o contrasinal necesario para empregar o sistema Cl@ve, os cidadáns deben acceder a través do seguinte enlace  https://clave.gob.es/clave_Home/registro.html

Para rexistrarse deben facelo a través de internet sen certificado electrónico accedendo ao enlace “Solicita la carta invitación” e o sistema levarate a “Registrarse en Cl@ve”. Tan só teñen que cubrir o seu número de DNI e data de caducidade deste.

A carta de invitación chegaralles a través do correo postal ao seu domicilio fiscal no prazo aproximado dunha semana. Nesta carta enviaranlles un Código Seguro de Verificación (CSV) que poderán activar en poucos minutos seguindo as instrucións que nela se lles indican. Así de fácil terán esta identificación electrónica que é válida para realizar trámites telemáticos no Concello de Mos e en moitas outras administracións públicas.

Ante calquera dúbida da veciñanza mosense sobre o funcionamento do sistema Cl@ve, poden chamar ao departamento municipal de Rexistro Xeral ao número 986 33 12 00 onde lla resolverán.