Hoxe martes 23 de xuño, dentro do programa municipal “Vive Mos nas Redes”, comezarán a impartirse por parte dos monitores deportivos municipais clases en directo dirixidas a adultos maiores.

As sesións en directo terán lugar todos os martes e xoves ás 10.00 horas da mañá, cunha duración de 45 minutos por clase, a través da canle de YouTube do Concello. A posteriori compartiranse tamén no Facebook no Concello para quen queira realizar a clase noutro momento. Correrán a cargo dos monitores deportivos Lorena Lago Seijo e Paco Villanueva, que impartirán as clases conxuntamente desde unha aula da Axencia de Colocación.

Aínda que poden realizar a clase en directo todos os adultos maiores que desexen facelo, a iniciativa está organizada para ofrecerlle unha alternativa aos usuarios do programa Exercítate do Concello, que deixou de impartirse presencialmente por mor da crise sanitaria do COVID-19. Cos devanditos usuarios de Exercítate contactouse telefónicamente para ofrecerlles esta alternativa e 25 xa confirmaron que participarían na sesión de mañá.

En cada clase haberá unha parte inicial de quecemento e unha parte central de potenciación de aspectos necesarios nesas idades como equilibrio, forza, mobilidade, cardio… Nalgunha sesión realizaranse tamén exercizos específicos de CORE e/ou de tonificación con utensilios fácilmente localizables en calquera fogar tales como: unha pica ou pau de vasoira, unhas botellas de auga a modo de pesas, unha cadeira… etc.
Serán sempre clases dinámicas e adaptadas aos usuarios, tal e como se viña facendo no programa Exercítate.