A Consellería de Educación, Universidade e Formación Profesional vén de publicar na plataforma Contratos de Galicia a adxudicación da obra de ampliación dos talleres do IES de Salvaterra de Miño, por importe de 528.891 €. As obras compatibilizaranse co inicio do curso escolar, sempre baixo as máximas medidas de seguridade. Os traballos teñen un prazo de execución de 9 meses.

A actuación ten como finalidade atender as necesidades de espazo dos ciclos da familia de Madeira, moble e cortiza, mediante a ampliación do espazo de talleres do instituto. Para iso empregaranse 244,67 m² da planta inferior do actual ximnasio, agora mesmo infrautilizado, para destinalo a taller de carpintería.

Para poder aproveitar de xeito satisfactorio este espazo ampliarase a súa altura mediante o recalce da cimentación dos muros perimetrais e a substitución de piares por vigas metálicas.

Dotarase tamén dun acceso á zona de vestiarios, tamén situada na planta inferior do ximnasio, cun vestíbulo de separación.

Ao novo taller de carpintaría abriránselle fiestras na fachada cara á pista deportiva, co fin de permitir a entrada de luz natural, así como un portón que facilite a carga e descarga desde vehículos dos materiais necesarios. A entrada será, ademais, accesible mediante a construción dunha rampla tanto para vehículos como para peóns. O taller estará dotado, así mesmo, dun almacén anexo polo exterior de 16,12 m².

A actuación inclúen tamén a reforma da pavimentación exterior, así como a mellora do sistema de protección contra raios do IES de Salvaterra de Miño.