A finais do pasado mes de agosto, en concreto o día 26, saíu a primeira unidade do novo Toyota GR Yaris da liña de produción da planta de Motomachi, en Toyota City (Xapón). A planta de produción do GR Yaris, totalmente nova, foi deseñada para cumprir as necesidades concretas de fabricación do novo deportivo de Toyota, que está chamado a ser o novo referente entre os compactos deportivos grazas ao seu motor de tres cilindros, 1.6 litros e 261 CV, a súa tracción total, a súa construción en materiais lixeiros e o seu bastidor froito da mestura de dúas das mellores plataformas de Toyota.

O regreso de Toyota á fabricación de deportivos en Xapón ofreceu aos enxeñeiros de produción a oportunidade de redeseñar os procesos de ensamblaxe, en particular para o novo GR Yaris. TOYOTA GAZOO Racing creou a ‘Fábrica GR’, unha planta dedicada á produción de vehículos deportivos GR.