"Tal situación vén deribada polo descontrol no servizo, con días sen ningún axente de policía, sumado á política que vén practicando o goberno Municipal, obrigando aos Policías locais a sancionar indiscriminadamente" explican dende ACIP nun comunicado.

Como engadido, "é importante destacar o afán recadatorio do goberno local, utilizando un radar privado nas rúas de Ponteareas, onde nas pasadas semanas cambiaron a velocidade limitándoa a 20 km/h no centro urbano, e 30 km/h na rúa Castelao".

"Mais grave é que o propio radar é privado, pois o propietario é a empresa que realiza a recadación para o Concello de Ponteareas. É dicir, a empresa recadadora encárgase de comprar un radar para que os policías locais recaden para a empresa e o Concello" aseguran.

"Seguiremos reclamando que as denuncias realizadas polos auxiliares de policía que non son funcionarios, xa que a lei é clara, só poden denunciar os funcionarios. A trampa encuberta é que realizan as multas como voluntarios, e despois as firma o oficial de policía, algo ilegal e que serian tombadas nos xulgados se os veciños denunciasen polas irregularidades" engaden.

Para o Portavoz de ACiP Juan Carlos González Carrera "está claro que para este goberno a súa única política é a de recadar. No ano 2018 recadaron preto dos 300.000 euros e o pasado ano aínda non nos deron acceso á memoria de recadación, pero temémonos que superará esa cantidade, máis cando a maioría das sancións son realizadas polos auxiliares de policía, o cal é ilegal".

"Temos claro cal é a prioridade deste goberno local do BNG coa complicidade do PSOE, crear un pobo pantasma sen actividade económica, e que quede para catro, cando Ponteareas foi sempre todo o contrario, un pobo situado estratexicamente, hospitalario con mercados e actividades económicas, comercio e hostalería, etc... onde os veciños das Parroquias e demais Concellos compraban semanalmente, e agora coa persecución, limitación e prohibicións de aparcamento desprázanse a outros  Concellos onde lles dan facilidades, mentres aquí danlles receitas de multas".

Resulta "indignante a situación da Policía local, a cal hai días que non presta servizo pola noite como o pasado día 24 de Setembro, onde só atopábase un auxiliar de Policía de servizo, imposibilitando a existencia dun bo servizo de Policía local, algo inasumible cun goberno que presume e realiza propaganda de sancionar con radar, recadar con multas indiscriminadamente, pero sen seguridade cidadá pola noite, e máis nestes momentos onde se require mais presencia na rúa debido á situación de restrición polas noites, e vendo como as demandas dos veciños pásanas á Garda Civil".

"Esta situación fai insostible a convivencia e o día dos veciños, tendo en conta que a función da Policía Local debería ser a de atender, axudar na convivencia e necesidades dos veciños e facer cumprir as ordenanzas municipais, pero non, agora mesmo obríganos a recadar a través das sancións e radar" explican.

Por último esixen "un cambio de política inmediata en materia de seguridade, que os veciños vexan na rúa unha verdadeira Policía Local e non manipulada politicamente, o cal prexudica gravemente, vendo casos claros de persecucións persoais cara a algúns locais e negocios deste  Concello, sancionando aos mesmos en termos irregulares".