A Xunta de Galicia vén de remitir para firma ao Concello de Vigo o texto da addenda ao convenio de colaboración entre a Administración autonómica e local para o financiamento do novo plan xeral de ordenación municipal. Trátase da segunda addenda que a Consellería de Medio Ambiente, Territorio e Vivenda tramita e ten por obxectivo adecuar o pago das axudas ao ritmo dos traballos de redacción do documento de planeamento.

A conselleira de Medio Ambiente, Territorio e Vivenda, Ángeles Vázquez, confirmou esta mañá á delegada territorial da Xunta de Galicia en Vigo, Marta Fernández-Tapias, -coa que mantivo unha reunión por videoconferencia- esta decisión do seu departamento que non implicará unha dilación das anualidades, polo que se mantén o 2021 como último ano no que a Xunta aboará unha porcentaxe do importe financiado, que ascende a máis dun millón de euros.

Neste sentido, invita ao Concello a avanzar na tramitación e acadar no presente ano a aprobación inicial e provisional, fitos que representarían un gran avance na redacción do plan xeral e, unha vez acreditados, suporía que a Xunta abonaría un 70% da axuda que habilitou o Goberno galego para financiar -por segunda vez- o PXOM de Vigo. A conselleira recordou que desde o pasado mes de febreiro ten solicitado os certificados para proceder ao pago de máis de 200.000 euros, unha contía que se sumaría aos case 165.000 euros, xa aboados na primeira anualidade.

Ambas representantes da Xunta defenderon que a tramitación da segunda addenda é unha nova mostra de colaboración da Xunta co Concello de Vigo e do compromiso do Goberno galego para que Vigo dispoña canto antes de plan xeral de ordenación municipal.

Borrador de plan xeral tramitado e informado
A conselleira de Medio Ambiente destacou que na actualidade o seu departamento non ten pendente, de tramitar nin de informar, ningunha cuestión relativa o borrador do Plan Xeral de Ordenación Municipal de Vigo.

Recordou que a finais de setembro a Dirección Xeral de Calidade Ambiental emitía a  Resolución pola que se formula o Documento de Alcance do Estudo Ambiental Estratéxico do PXOM de Vigo; polo que cumpriu en tempo e forma cos trámites que dependen do Goberno galego, tanto cos ambientais como cos urbanísticos; pois a comezos dese mesmo mes se trasladaba o contido do informe sobre a análise -desde o punto de vista urbanístico- do contido do borrador do novo plan xeral.

 

Ángeles Vázquez e Marta Fernández– Tapias coinciden en que esta decisión é unha nova mostra de colaboración da Administración autonómica para facilitar e axudar ao Concello de Vigo a acadar canto antes un plan xeral de ordenación municipal

 

Así, o Concello de Vigo deberá continuar coa tramitación e remitir ao órgano ambiental o expediente de avaliación ambiental estratéxica completo para que formule a Declaración Ambiental Estratéxica, documento que pon fin ao trámite ambiental por parte da Xunta.

Mostras de colaboración desde o ano 2015
O Plan Xeral de Vigo foi anulado por sentencia firme do Tribunal Supremo en novembro de 2015. Desde esa data, a Xunta traballou desde o primeiro momento para dar unha solución á situación urbanística da cidade olívica.

Desde entón, defendeu que a única solución definitiva á situación urbanística de Vigo era a aprobación dun novo plan xeral e con ese obxectivo tendeu a man ao consistorio vigués, impulsando outro convenio de colaboración para redactar o novo plan (o segundo, xa que a Administración autonómica xa contribuíra á redacción do PXOM anulado por unha sentencia do ano 2015), por un importe máximo de 1,03 millóns de euros.

Ademais, o Goberno galego ofreceu respostas provisionais e urxentes para evitar o parón urbanístico da cidade olívica, como a aprobación da Lei 3/2016, de 1 de marzo, de medidas en materia de proxectos públicos de urxencia ou de excepcional interese, para aportar unha solución a proxectos de especial interese levados a cabo polas administracións, como a ampliación da Zona Franca, o Ifevi ou a Estación Intermodal.

Tamén impulsou un ano despois a redacción da Lei de medidas provisionais de ordenación urbanística, solución legal e amparada xuridicamente para permitir que certas zonas puideran seguir evolucionando a través dunha ordenación provisional, capaz de garantir o desenvolvemento económico das iniciativas de pequenos empresarios e particulares.