Esta semana celebrouse unha nova sesión da Comisión de Seguemento da Evolución da COVID-19 en Mos aproveitando a publicación das novas medidas decretadas pola Xunta de Galicia.

A Comisión centrouse, dada a proximidade do día de Todos os Santos o domingo 1 de novembro, nos protocolos municipais a poñer en marcha de cara a esa data tan sinalada.

As medidas máis destacables, recomendadas por técnicos e expertos municipais, serán que se fará un control de temperatura para o acceso nos cemiterios municipais de Torroso e Mos, e que haberá control policial durante toda a xornada nos cemiterios parroquias das 10 parroquias mosenses, para asegurar que non se formen grupos de máis de 5 persoas nos mesmos e se manteña a distancia de seguridade.

Ademais por suposto deberase manter a distancia de seguridade de 2 metros, o uso da mascarilla é obrigatorio e nos cemiterios municipais a Misa celebrarase na Igrexa Parroquial.

Por outra banda, debido ao avance dos contaxios polo COVID-19, e facéndose eco das novas medidas decretadas pola Xunta de Galicia por este motivo para protexer a saúde e seguridade da cidadanía, conter a progresión da enfermidade e reforzar o sistema de saúde pública, ordéase a situación de nivel 2 en toda a Comunidade Autónoma, polo que se deberá de cumprir: Reunións de máximo 5 persoas. Prohibidas todas as festas e verbenas. Capacidades comerciais, de restauración e hostalería e lugares de culto ao 50%. Capacidades nas terrazas ao 75%. Prohibición de consumo na barras dos bares. Limitacións de capacidades: Vodas 100 no exterior e 50 no interior. Velorios e enterros 25 exterior e 10 no interior. Eventos deportivos: 150 exterior e 60 no interior.

Respecto destas novas medidas autonómicas no Concello de Mos, tal e como acordou esta mañá a Comisión de seguemento, quedan interrompidos ata novo aviso os programas municipais de cursos culturais e deportivos ‘Tempo de Lecer’, ‘Exercítate’ e ‘Cóidate’, as clases de Aquagym na piscina municipal reduciranse a grupos de 5 alumnos máis o monitor/a, e as clases e adestramentos de fútbol non federado nos Campos Municipais poderanse realizar ao aire libre ata un máximo de 100 persoas pero agrupadas en grupos de 5 participantes (4 alumnos/as máis 1 monitor/a).

No caso dos eventos culturales como o concerto de Milladoiro incluído na programación de La Vuelta en Mos, o aforo de público queda tamén reducido. Neste caso serán 60 persoas as que poidan asistir a ver a Milladoiro no auditorio do Centro Dotacional de Torroso o vindeiro sábado, 24 de outubro, ás 20.00 horas.

Ademais desde o Concello contactarase con todas as asociacións, colectivos e clubes veciñais, culturais e deportivos para que sexan rigorosos no cumprimento da normativa nas actividades dos seus locais sociais.
E por último, na Comisión de hoxe, acordouse tamén incentivar as desinfeccións nas zonas comerciais do municipio.