A conselleira de Política Social, Fabiola García, destacou que a Xunta cuadriplicará este ano a cobertura das casas do maior ata chegar ás 80 en toda a Comunidade. Fíxoo durante unha reunión por videoconferencia cos responsables dos 20 centros en funcionamento na actualidade e á que tamén asistiron os delegados territoriais da Xunta de Galicia nas catro provincias.

 

O Goberno galego destina 515.000 euros para o mantemento dos 20 centros en funcionamento na actualidade

 

Fabiola García sinalou que estes pequenos centros de día no rural, totalmente gratuítos para os usuarios, ofrecen un lugar de atención e coidado diúrno a preto de 100 persoas. O Goberno galego incrementará este ano nun 42,5% o orzamento destinado a estender a rede de casas do maior ata os 2,2 millóns de euros.

Así mesmo, a conselleira lembrou que a Xunta vén de publicar a orde de axudas para dar continuidade ás 20 casas do maior en funcionamento na actualidade, para o que se destinaron 515.000 euros. Deste xeito, explicou que o Goberno autonómico “segue apostando por un servizo posto en marcha no ano 2018 para darlle ás persoas maiores do rural as mesmas prestación que nunha cidade”.