O titular do Goberno galego, Alberto Núñez Feijóo, destacou esta semana que o novo albergue de peregrinos de Vigo contribuirá a seguir mellorando a cidade e a experiencia xacobea.

Durante unha visita ás obras do novo albergue, Feijóo incidiu no papel das rutas xacobeas para transformar aldeas, vilas e cidades. Así, salientou que, cun investimento de 1,6 millóns de euros, este proxecto na cidade olívica consegue recuperar e unir dúas edificacións anexas entre a rúa do Berbés e a praza do Peñasco.

“Estamos a falar dun novo edificio que, no seu conxunto, contará cun total de seis plantas e cunhas instalacións totalmente accesibles para aloxar a 93 persoas”, dixo, recordando que este albergue forma parte dos traballos que se están a acometer para preparar o ano santo.

 

Dentro do plan director do Camiño, subliña que a Xunta destinou ata agora máis de 33 millóns de euros a albergues para, entre outras cousas, construír nove e levar a cabo melloras noutros dezaoito

 

“Non deixamos de traballar e seguimos preparándonos para aproveitar a oportunidade que supón un Xacobeo que se estenderá ata o 2022”, abundou, referíndose tamén á posta en marcha do proceso de certificación deste tipo de aloxamentos coa Q de Calidade.

Nesta liña, e dentro do plan director do Camiño, explicou que a Xunta destinou, ata agora máis de 33 millóns de euros a albergues para, entre outras cousas, construír nove e levar a cabo melloras noutros dezaoito. Ademais de confirmar a construción de 4 novos en Ferrol, Piñor, Sobrado dos Monxes e no concello da Coruña.

Así mesmo, o presidente da Xunta aseverou que ao longo deste ano realizaranse novas actuacións para mellorar os sendeiros e as estradas.

Feijóo concluíu subliñando que este albergue forma parte da aposta do Executivo galego pola rehabilitación. Non en van, na zona histórica de Vigo, a Xunta rehabilitou máis de 110 vivendas e 33 locais.