O deputado provincial de Deportes, Gorka Gómez, mantivo hoxe un encontro co Club Ciclista Rías Baixas ás portas dun hotel de Vigo, onde o equipo está concentrado de cara ao comezo da temporada. Participaron os deportistas xunto co presidente, José Luis Chamorro, e o xerente, Gerado Chamorro.

O Club, logo de atravesar un 2020 moi difícil por mor da pandemia que estamos a padecer, loitará este ano nas categorías Elite e Sub23 por sumar éxitos como gañar a Copa de España, a Volta a Galicia ou o Campionato Galego, que este ano organiza o propio club o 17 de maio, coincidindo coa festividade do Día das Letras Galegas. O  Rías Baixas participará o próximo domingo, 28 de febreiro, na primeira proba deste ano en Colindres, Cantabria.