Nesta nova entrega de ”Sen código postal”, Anselmo ten unha cita cos artistas de Cambados. Empezando polos seu anfitrións, Pauliña e Quique, unha parella de cantautores e músicos cos que Anselmo descubrirá os tesouros que agocha a vila. Un pintor, un compositor que musicou os poemas de Cabanillas, a Fundación Manolo Paz e a praia Espiñeiro sorprenderán a Anselmo cunha riqueza artística allea, en moitos casos, os ollos do turismo convencional.

O broche final virá a man da nosa cicerone, que nos ofrecerá unha das súas composicións en directo.

“Sen código postal” conta cun vello coñecido da TVG, Anselmo, o carteiro de Luar, que agora é o carteiro da TVG. Anselmo é un tipo peculiar e simpático, que sempre vai coa súa bicicleta, a súa carteira amarela e a súa peculiar gorra con anteollos. Agora está de volta para percorrer Galicia e levar unha carta a un veciño para que lle ensine os recunchos da súa vila e se gañe con iso o recoñecemento de embaixador.

O programa permitirá facer un paseo pola nosa terra visitando os lugares e conveciños máis descoñecidos, os máis simpáticos, os máis característicos e os máis sorprendentes, sempre ao xuízo das lembranzas e vivencias dos nosos cicerones.

O humor estará presente en cada un dos episodios e as bromas entre o presentador e os convidados marcarán o ritmo distendido deste novo programa que permitirá coñecer os recunchos menos explorados de Galicia.