Temos as primeiras imaxes oficiais da nova versión de edición limitada de Ferrari, á espera do lanzamento mundial que será retransmitido en directo o próximo 5 de maio ás 14: 30 CEST a través das redes sociais de Maranello.

Este automóbil representa a máxima expresión do concepto berlinetta extrema con motor dianteiro e eleva ata un novo nivel o carácter único do amplamente galardoado 812 Superfast. O modelo encarna á perfección o incomparable ADN deportivo de Ferrari, que afunde as súas raíces nos máis de setenta anos de experiencia en competición da compañía en todo o mundo, combinando á perfección prestacións, forma e funcionalidade. Dirixido a un selecto grupo de coleccionistas apaixonados e bos coñecedores da historia da marca, inclúe solucións extremas de enxeñería concibidas para garantir o máximo pracer na súa condución.

Como manda a tradición Ferrari, o seu elemento máis relevante reside no seu corazón, é dicir, a evolución máis recente do lendario motor de doce cilindros atmosférico con ángulo de 65° entre as bancadas de cilindros. Este motor é capaz de ofrecer a maior potencia que xamais existise nun modelo Ferrari de serie (830 CV) cun réxime máximo de 9.500 rpm, un novo récord para un motor de combustión Ferrari. A utilización de materiais de última xeración, o redeseño da maioría da compoñentes clave do motor, un innovador mecanismo de distribución de válvulas e un novo sistema de escape, son só algunhas das solucións técnicas que permiten ao coche alcanzar picos de rendemento aínda inexplorados no segmento dos V12.