O que facemos os seres humanos é construír. Desde ese instante eléctrico no que poñemos un pé no chan por primeira vez pero logo resulta que debaixo do pé hai unha peza de Leigo que tiraramos antes desde o berce, e entón collémola e encaixámola con outra. Si, construímos. Construímos unha vida, construímos un amor, construímos familias, casas, estradas, cidades, aeroportos e naves espaciais. Transformamos lugares en lugares novos. Ás veces son cambios mundanos. Ás veces son asombrosos. E os feitos asombrosos convértense en historias.

Territorios improbables é unha viaxe polas historias que construíron lugares tan extraordinarios que a miúdo nin sequera aparecen nas guías. Relatos pequenos e fazañas monumentais. Crónicas de éxitos, de fracasos, de praias baleiras e de barcos voadores. Historias de cidades encerradas en edificios e de edificios que viaxaron no tempo. De cicatrices de formigón e de castelos de cartón pedra. Historias de casas e familias. Historias de amor e de estradas.

Historias de vida.