A delegada territorial da Xunta, Marta Fernández-Tapias, amosou hoxe a súa sorpresa polo grado de descoñecemento da presidenta da Deputación de Pontevedra e primeira tenente de alcalde de Vigo, Carmela Silva, sobre as actuacións que se están levando a cabo nos concellos que, segundo reflexa na misiva, manifestan queixas sobre o “problema” do Camiño portugués pola costa.

Neste sentido, a representante autonómica sinalou que os alcaldes están perfectamente informados das actuacións e investimentos que se están a levar a cabo nos seus respectivos concellos, tanto de adecuación, como de mantemento e conservación da ruta xacobea,  dos albergues e en materia de seguridade. “Fala dunhas queixas das que dende logo nos non temos coñecemento”, aclarou.

Non menos chamativo resulta en opinión de Fernández-Tapias que sexa ela quen se queixe da falta de sinalización do Camiño, pois recorda que ademais de presidenta da Diputación é a número dous do goberno da única cidade de Europa que non conta coa sinalectica oficial por “un mero capricho do seu alcalde”.

Recorda así que, ante a “Xacobeofobia” de Caballero, os hostaleiros e comerciantes da cidade asumiron como propia a responsabilidade de sinalizar eles mesmos os seus establecementos ao paso do Camiño pola cidade. “Hai que ter pouca vergoña para facer esta reclamación”, entende quen considera que “hoxe a presidenta provincial quedou retratada”.

Xa por último, a delegada cifrou en máis de 7 millóns de euros os investimentos no Camiño Portugués e o da Costa, destacando a apertura do primeiro albergue da rede pública no itinerario que transcorre por Vigo. O albergue de peregrinos Juan Manuel López-Chaves, aberto recentemente no Berbés.

En canto á falta de coordinación con Portugal a que fixo referencia tamén Carmela Silva na súa misiva, Fernández-Tapias volveu a insistir no descoñecemento absoluto da presidenta da Deputación, para lembrar o compromiso expresado polo presidente da República de Portugal de que acudirá a Santiago este ano.