Podemos Salvaterra de Miño condenou este pasado xoves un novo episodio de homofobia en Galicia, concretamente, uns insultos pintados na praza do Concello e nun banco coas cores da bandeira do Orgullo inaugurado o pasado 23 de xuño. 

A portavoz Estrela Antas Carrera, condenou este suceso e considerouno “inadmisible”. “Non podemos consentir estes actos de odio no noso país e estes ataques continuos ao colectivo LGTBI. Estamos a ver ao longo das últimas semanas unha serie de acontecementos gravísimos que atentan directamente contra os dereitos do colectivo, temos que combater a homofobia”, subliña Antas. 

 

Estrela Antas Carrera: “É moi preocupante que un banco coas cores da bandeira do Orgullo xere tanto rexeitamento. Non podemos consentir estes actos de odio no noso país e estes ataques continuos ao colectivo LGTBI”

 

“É moi preocupante que un banco coas cores da bandeira do Orgullo xere tanto rexeitamento”, sinala a portavoz. Ademais, instou ao Goberno local a posicionarse a favor do dereitos LGTBI e en contra da LGTBIfobia, xa que este último acontecemento en Salvaterra de Miño pon en evidencia o necesario compromiso por parte das institucións e aínda máis nun contexto tan sensible tralo asasinato de Samuel na Coruña. 

Podemos recorda que o luns en localidades de toda Galicia se fixeron concentracións en repulsa do asasinato de Samuel, pero non en Salvaterra. "Alegrámonos de que esta vez o Concello si saíse a condenar este acto de vandalismo e odio, mais pedimos solidariedade e contundencia ante todas as violencias contra o colectivo LGTBI así como políticas que promovan a educación na diversidade e combatan a intolerancia".