O Museo do Mar de Galicia, xestionado pola Xunta, ofrece un completo programa de actividades ao longo de agosto dirixido especialmente á cativada, con obradoiros infantís de martes a domingo, xa que o luns permanece pechado. Pola súa banda, o público adulto ten a oportunidade de participar nas visitas guiadas para coñecer as instalacións e pezas tanto do museo como do Centro Arqueolóxico do Areal Salinae.

Así, todos os martes do mes desenvolverase Salvemos o noso mar! Reciclaxe para pequenos. Recomendado para nenos e nenas a partir de 6 anos, o obxectivo da actividade é concienciar do grave problema de contaminación por plásticos no mar e das pautas básicas para reciclar de xeito correcto.

Os mércores é a quenda de Tiburóns, non tan temibles como cremos. Realizada completamente no acuario do museo, aprovéitase a presenza de tiburóns para explicar diversos aspectos sobre esta especie. Ademais, os participantes poderán tocar a pel dun tiburón, ver os seus ovos e unha mandíbula de marraxo.

O mar, orixe da vida é a temática dos xoves, recomendada para rapazada a partir de 8 anos que, ademais de descubrir como a orixe da vida tivo lugar no mar, fará unha réplica dun fósil mariño para levar. Os venres dedicaranse a realizar visitas guiadas ao acuario para nenos e nenas a partir de 6 anos, na que coñecerán as especies que o habitan e curiosidades sobre elas.

Os sábados a rapazada a partir de 8 anos terá a posibilidade de converterse en artesáns castrexos para elaborar o seu propio pote como se faría nesa época. Ademais, afondarán  nos usos da cerámica na antigüidade e nalgunha das técnicas para traballala. Finalmente, para os domingos está programada Coñecendo as baleas, recomendada para cativada a partir de 6 anos na que se achegará a estes mamíferos mariños e elaborarán a súa propia balea con material de refugallo.

Todas as actividades infantís se desenvolverán ás 11,30 horas e terán unha duración aproximada de 45 minutos. Para participar cómpre inscribirse previamente no teléfono 986 247 750 e adquirir a entrada ao museo, de 3€ a xeral e de 1,50 para público de 8 a 18 anos. As persoas con menos de 8 anos, estudantes, demandantes de emprego e xubiladas acceden de balde. Os menores deberán estar acompañados dunha persoa adulta.

Visitas guiadas
Por outra banda, ao longo de todo o mes, de martes a domingo haberá tres visitas guiadas de presentación do museo para todos os públicos. Nelas coñeceranse as instalacións e as pezas expostas no centro, así como unha breve explicación no acuario. Os horarios nos que se poden realizar son 12,45, 17,00 e 18,15 horas e teñen unha duración aproximada dunha hora. Ao igual que nas actividades infantís, para participar cómpre inscribirse previamente e adquirir a entrada ao museo.

O Centro Arqueolóxico do Areal Salinae ofrece tamén visitas guiadas nas que, ademais dos contidos, se pode ver a única salina mariña de evaporación solar do Imperio Romano conservada e musealizada. Os percorridos terán lugar os sábados e domingos ás 11,15 e ás 12,30 horas cunha duración aproximada de 45 minutos. Son de balde con reserva previa.

O Museo do Mar de Galicia creouse a prol da difusión da enorme vinculación histórica do pobo galego co mar, a través do seu coñecemento e aproveitamento. Nesta liña, as actividades de verán enmárcanse na ampla programación didáctica que desenvolve o centro xestionado pola Xunta ao longo de todo o ano e que se suma á súa exposición permanente, así como ás mostras temporais e múltiples eventos de divulgación e lecer organizados neste espazo.