A OMIX de Tomiño continúa coa súa oferta formativa para os meses de setembro e outubro. Esta semana comezará o seu obradoiro de iniciación ao lettering, un curso para iniciarse na arte de crear composicións con letras derivadas que supuxo todo un éxito no número de inscricións, especialmente entre o público adolescente.

Ademais deste obradoiro, desde a oficina municipal informan de que aínda están abertas as inscricións para o curso de podcasting, unha actividade que pretende proporcionar todos os coñecementos creativos, técnicos e de distribución de contidos dixitais sonoros en formato podcast coa intención de que o alumnado asistente teña total autonomía para crear os seus propios contidos e poda dar a coñecer os seus proxectos, traballos e intereses. O curso será online, terá lugar os días 18 e 25 de setembro en horario de 9:30 a 14:30 horas, ten un prezo de 10 euros e está dirixido preferentemente á poboación con idades comprendidas entre os 12 e os 35 anos.

Do mesmo xeito, a oficina continúa coa súa aposta estratéxica pola formación en idiomas, unha actividade con moita aceptación e demanda entre a poboación xuvenil. Para o mes de outubro tamén está prevista a realización dun curso de Francés nivel A1.2, que será impartido de forma online por unha profesora nativa cunha metodoloxía activa e participativa que favoreza a aprendizaxe do idioma dunha forma divertida. A data de inicio será o 13 de outubro e os horarios serán todos os mércores de 20:00 a 22:00 horas. Está dirixido a un público preferente con idades comprendidas entre os 12 e os 35 anos e ten un prezo de 10 euros.

Para inscribirse nestes cursos cómpre cubrir un formulario a través da páxina web do Concello de Tomiño en https://tomino.gal/.