Na tarde do pasado mércores, mantívose unha reunión entre o equipo de goberno, representantes dos partidos da oposición e un grupo de empresarios que son os que actualmente encóntranse en negociacións ca Comunidade de Montes de Tameiga, para manter as súas empresas en solo mosense ó remate dos seus contratos.

Segundo os socialistas “das empresas que están en solo dos comuneiros, algunhas renovaron o contrato de aluguer e catro empresarios son os que están tendo máis dificultades para chegar a entendemento”. Na reunión, os socialistas din que asistiron “para escoitar a posición dos empresarios” xa que afirman que “desexan que se chegue a un entendemento, sen perxudicar así o tecido empresarial de Mos”.

Os socialistas expresan a súa preocupación ante a posición do concello ca Comunidade de Montes de Tameiga. A voceira socialista, Victoria Alonso, solicítalle ó Concello de Mos que manteña unha reunión ca Comunidade de Montes e que intente exercer unha capacidade mediadora por ser a administración que máis preto está de ámbalas partes. Alonso insiste nesta postura xa que na propia reunión, algún empresario dixo que sería bo esgotar tódalas opcións de dialogo. Fronte a esta idea temos a postura da alcaldesa, que a voceira socialista tacha de partidista e irracional de non querer sentarse con Tameiga baixo ningún concepto. Alonso finaliza dicindo que unha alcaldesa debería saber deixar a un lado terceiras cuestións cando se trata dun tema de interese veciñal.

O concelleiro do BNG, Gustavo Barcia, asegura que acudiu “con ánimo construtivo e á procura dunha solución beneficiosa para todas as partes”, pero a negativa do PP a convidar á Comunidade de Montes supón unha barreira para chegar a acordos.

Entre as propostas achegadas polos nacionalistas figura a de “exercer presión sobre a Xunta de Galiza para que poña a disposición destas empresas as parcelas libres do polígono da Veigadaña cunhas condicións vantaxosas”.