A democracia interna dentro do PSdeG-PSOE volve activarse co inicio do proceso para a renovación dos órganos de goberno. Un proceso que concluirá durante a fin de semana do 15 e 16 de xaneiro e que foi anunciado recentemente polo secretario xeral provincial, David Regades, durante a celebración da Comisión Executiva Provincial. Regades subliñou que “despois dos congresos Federal e Nacional, agora tocaba o Provincial”

A Executiva provincial convocou ao Comité Provincial para o próximo xoves, día 11, como órgano formalmente competente para a convocatoria do Congreso e a proposta de calendario. A sesión do Comité, no que están representadas tódalas agrupacións da provincia, celebrarase en Poio.

Regades, que ostenta a secretaría xeral provincial dende decembro de 2017, fixo un balanzo positivo destes catro anos e destacou que o Partido Socialista pasou neste tempo de 10 deputados provinciais a 13, de 16 alcaldías a 23, de cinco maiorías absolutas municipais a 11, de catro deputados autonómicos a 5, de non ter representación no Senado a dous senadores/as e de dous congresistas a tres. “Houbo un crecemento nesta provincia por enriba do resto das provincias de Galicia, ata o punto de que a forza do socialismo na provincia de Pontevedra sitúao entre as primeiras de España”.

Regades atribúe todos estes éxitos á unión da militancia en todo o territorio provincial e, “por respecto á militancia”, rexeitou comentar se se presentará á reelección como secretario xeral provincial: “Agora é o tempo da convocatoria do Congreso provincial, xa chegará o tempo das candidaturas á Secretaría Xeral”.

O secretario xeral non dubidou en afirmar que se agora se celebraran Eleccións Municipais, o PSdeG-PSOE obtería maioría absoluta na Deputación (agora fáltalle un só deputado/a) e por iso fixou como obxectivo do próximo Congreso provincial sentar as bases para non só volver ser primeira forza local en 2023, senón para gañar máis alcaldías.